لا أخذت في خاطري من واحد ٍ غالي

لا أخذت في خاطري من واحد ٍ غالي
ماعاد ابي الناس قاصيها ودانيها


ماعاد ابي اللي ينشّدني عن احوالي
العزله .. ابرك من الدنيا ومافيها


اجلس الحالي وانادم نفسي الحالي
مهموم / وهمومي الله لايحييها


اغيب عن مجتمع خلق الله أشوا لي
وادلّه النفس .. لين الله يسويها


اضحك وانا الصدر لاداله ولا سالي
من ضيقة ٍ ماتجنّب عن حراويها


لا اونستها في ضلوعي كنها الصالي !
الناس ماعاد اناديها بأساميها


كنيتها لين شفت الشرّ في حالي
عجزت لأهرج بها وازريت لا أخفيها


ان جيت ابهرج بها شي ٍ ماينقالي
وان جيت ابسكت لـ( نار ٍ من يصاليها ) !


حتى تساوا مذاق المر والحالي
حسبي على كلمة ٍ ماني بناسيها


ياليتها من عدويني وعذالي
والله لـ( تلقى ) الجواب اللي يداويها


لكنها من حشيم ٍ منزله عالي
احترت فيها ولا ادري وين اوديها !


مردودها كل مامنّه تهيّالي
شيّمت نفسي عن اولها وتاليها


تمرني جعل والله مالها والي
ماكني اوحيتها من فمّ راعيها


واصد من دون لا أشاور ولا أمالي
بضاعة ٍ بين بايعها وشاريها


ماني بـ( ناقص ) غرابيل اول وتالي
روحي من الوقت فيها مايكفيها


سوالف ٍ كل مامرت على بالي
سمحت من خيرة ٍ كنت متحريها


ياحرّ كبدي وياهمي وغربالي
مصيبه ان كان حاميها حراميها


ضايق وضاقت بي فجوج الخلا الخالي
والنار ماتحرق إلا رجل واطيها


مهما يدور الزمان ويأمن الجالي

مايجرح الرووح غير طعوون غاليها

قصيدة جميلة..

اشكرك على الطرح الراااقي..

وبانتظار المزيد..

صح لسانك وتسلم يمينك عالابيات الرائعه
الله يعطيكِ العافيه

صح لسسسسسسسسانك ...

و الله القصيده رووووووعه ..

نابعه من معاناه ... و ألم في داخل الصدر مكبوت ..

لكن ربي يفرج الضيقه و يجلي الهم ...

شكرا من القلب